Još jedan karneval je za namin pa je red za se zafalimo onima ki su pokumpanjali njegovu organizaciju.

Fala lipa

 –           Metajnariman, na lipoj viceri u cetvrtak u njihovome portu.

–           Koćaru i njegovin mornariman, ca su nas u Metajnu brodon poveli i sritno doma doveli. Ca su namin i našin gostiman krez svi karnevalski dani, meso na plahu pekli i vino tocili.

–           Paškin vatrogasciman i Škuli, ca su udomili naši gosti Feštari, Zvončari i Kaštelani.

–           Glazbariman, ca su naucili sve one melodije na ke su tancale karnevalske grupe od Europe.

–           Članovima “Družine” ki su kaj i uvik, sa manjeron i sa puno voje prežentali paški tanac.

–           Našin Nizozemciman, Mađariman, Švediman,  Austrijanciman, Španjolciman, Slovenciman i Talijaniman, ki su se našli vrimena parićat se u nako velikomen broju maškarat se i sa puno mota i gušta tancat i caratanat na binu. I neka znate da smo van već deventali karnevalski posal za dogodišća.

–           Vijolicama ca su i vo godišće procvitale za vrime litnjega karnevala.

–           Kolarima, pogrebnicima i sviman drugiman ožalošćeniman za Markon.

–           Svin sponzoriman i dobročiniteljiman ki su na bilo ki mod pomogli organizaciju karnevala.

–           Domaćima i fureštima, maškaranima i nemaškarinima ki su došli na pijacu pokumpanjat litnji karneval oli samo uživat u njemu.

–           I oniman ca su ostali doma i deržali “rozi u tašku”. Nisu nan falili.

Još jedanput, fala lipa svima i vidimo se dogodišća na Jubilarnome 55. Litnjemu paškomu karnevalu!